27 чэрвеня 2024 г. у выставачнай зале экспазіцыі «Музей вайны –тэрыторыя міру» адбылося адкрыццё выстаўкі «Ліпень 1944 г. Яснае неба над Брэстам», якая прысвечана 80-годдзю вызвалення Беларусі ад нямецка-фашысцкіх захопнікаў.
Агульная задума аперацыі «Баграціён» складалася ў знішчэнні флангаў нямецкай групы армій «Цэнтр» і поўным вызваленні Беларусі.
У аперацыі, праведзенай з 23 чэрвеня па 29 жніўня 1944 года, прымалі ўдзел войскі 1-га Прыбалтыйскага (камандуючы – генерал арміі І.Х.Баграмян), 1-га, 2-га і 3-га Беларускага франтоў (камандуючыя: генерал арміі К.К.Ракасоўскі, генерал арміі Г.Ф.Захараў, генерал-палкоўнік І.Д.Чарняхоўскі), сілы Дняпроўскай ваеннай флатыліі, 1-й арміі Войска Польскага.
3 ліпеня 1944 года, пасля разгрому 105-тысячнай нямецкай групоўкі, быў вызвалены г. Мінск.
Апошнім абласным цэнтрам Беларусі, які быў поўнасцю ачышчаны ад праціўніка 28 ліпеня 1944 года, стаў г.Брэст. Скончыліся 1132 дні акупацыі горада! Скончыліся 1132 дні акупацыі горада!
28 ліпеня 1944 года ў 23 гадзіны ў г. Маскве дваццаццю артылерыйскімі залпамі з двухсот дваццаці чатырох гармат краіна салютавала войскам 1-га Беларускага фронта.
У ходзе аперацыі «Баграціён», якая доўжылася 68 сутак, Чырвоная армія нанесла найбуйнейшае паражэнне нямецкай арміі за ўсю ваенную гісторыю Германіі, разграміўшы групу армій «Цэнтр». Вызвалены Беларуская ССР, частка Літоўскай і Латвійскай ССР, ажыццёўлены прарыў у Польшчу, савецкія войскі выйшлі да мяжы Усходняй Прусіі. Такім чынам, былі створаны спрыяльныя ўмовы для далейшага наступлення Чырвонай арміі ў напрамку на Берлін.
На выстаўцы прадстаўлены асабістыя рэчы, дакументы, фотаздымкі ўдзельнікаў вызвалення Беларусі, а таксама ўдзельнікаў партызанскага і падпольнага руху.
На адкрыцці выстаўкі прысутнічалі ваеннаслужачыя, прадстаўнікі дыпламатычных місій і грамадскасці.
Выстаўка будзе экспанавацца да 15 жніўня 2024 г.